Manufahi RKM News====Federasaun futebol Timor leste (FFTL) kuarta-feira (09/06) horsehik, fasilita formasaun arbitrájén rejionál lével (D3), ba árbitu na’in 25 husi asosiasaun Fotebol Manufahi, Ainaro no Aileu, durante loron 5 iha salaun servisu agrikultura munisípiu Manufahi.
Diretór arbitrájén Federasaun futebol Timor leste (FFTL) ,Nívio da Costa Fernandes kinta-feira (10/06) ohin informa, árbitu na’in 25 ne’e tuir ona formasaun arbitrajém levél (D), selisaun husi asosiasaun futebol Aileu (AFA) árbitu na’in 5, Federasaun futebol distritu Ainaro (AFDA) na’in 5, no asosiasaun futebol Manufahi (AFM) árbitu na’in 15, no formasaun ne’e atu hasa’e kapasidade kona ba regulamentu no téknika arbitrajén nian, nune’e sira bele organiza jogu futebol iha ida-idak nia munisípiu.
Tuir diretór arbitrajén FFTL ne’e, formasaun ne’e iha matéria 2 maka importante, kona ba téknika ka regulamentu arbitrajén nian, no matéria ida seluk kona fitnes atu teste árbitu sira atu bele hetan selisaun árbitu ne’ebé iha kualidade iha kampu.
Fatin hanesan, árbitu Madalena Rodrigues Mani, husi asosiasaun futebol Aileu sente urgullu tanba bele fó opurtunidade ba feto foinsa’e sira, tuir formasaun kona ba arbitrájen level D3 nian hodi bele organiza jogu futebol iha kampu.
Árbitu Marshal Martins husi asosiasaun futebol Ainaro, no Casmiro dos Santos Siqueira husi asosiasaun futebol Manufahi, sente urgulu bele tuir formasaun arbitrájen ba segunda parte ne’e, bele hakle’an tan foinsa’e sira nia kueñesementu kona ba regulamentu arbitrájen nian, nune’e bele foti dezisaun ruma iha kampu laran baseia ba regulamentu arbitrájen nian.(ekb)
