Manufahi RKM news— Sabadú, (26/02),Administrador minisípiu Manufahi, Arantes Isaac Sarmento, louva no agradese ba familía saudozu Miguel Antonio Mota ho esforsu buka rasik restu mortais hodi entrega ba Ministério Assuntos kombatentes libertasaun nacionál, sekretariu estadu asuntu veteranus kombatentes libertasaun nasionál konsellu kombatentes libertasaun nasionál.
“Ita agradese tebes ba familía inisiativa buka saudozu nia restu mortais hodi mai entrega ba estadu hodi halo’ot iha ossuariu Luak”dehan Arantes iha Luak Manufahi Suku Daisua
Tuir nia katak, saudozu merese duni atu hetan fatin ida ne’ebé estadu ho governu prepara tanba sira nia kontribuisaun ba mak ohin loron rai ida ne’e sai nasaun repúblika demokratíka Timor Leste.
“Agradese mós ba familia tanba bele oferese ninia oan ida hodi hakerek istoria ba libertasaun patria, bainhira la ho sira no heroi sira seluk ohin loron ita la sai nasaun ida”nia dehan.
Tanba ne’e ba jerasaun foun sira tenki kaer metin espiritu patriotismo no nasionálismu ne’ebé saudozu sira oferese a’an ba rai ida ne’e to’o ohin loron ita hetan ukun rasik a’an.
“Ita tenki kaer metin domin no kaer metin saudozu sira nia obra ne’ebé halo ba rai ida ne’e hodi kontribui ba prosesu desenvolvimentu nasaun ida ne’e tanba sira mak ohin Timor sai nasaun repúblika demokratíka Timor Leste”nia dehan.
Tempu hanesan prezidente konsellu veteranus municipal, munisípiu Manufahi, Tobias da Costa magno (Maksakor) hateten, prosesu tomak maske familía ho inisiativa tomak buka maibé parte parte veteranus ho ministeriu apoiu kaisaun, bandeira no ambulansia hodi tula saudozu nia ruin.
“Hafoin familía hetan lori ba halo’ot iha saudozu nia uma lisan no ohin entrega mai konsellu kombantentes munisípiu ho nasionál hodi halo’ot”nia sublina.
José Mendes Sarmento hanesan familía hosi saudozu hateten, iha prosesu buka restu mortais la hetan maibé liu husi sasin balun husi munisípiu Liquiça ne’ebé hetan mak hatudu ami ba hasai.
“Hafoin sasin fó hatene ami familía planu atu foti iha tinan 2014-2015 maibé tanba ita nia estadu moris hela ho orsamentu duodesimu neduni proposta rua ami haruka ba la konsege aprova no iha tinan 2021 nafatn tau iha planu maibé tanba pandemia Covid-19 buat hotu paradu”dehan, José.
Maske proposta ba ministériu relevante la pasa no no situasaun pandemia ninia laran halo paradu maibé ami familía nafatin buka alternative nune’e iha tinan 2022 livre oitoan ami foti tiha saudozu nia ruin lori mai nia rai moris fatin aldeia Roin, suku Tutuluto, postu administrativu Same, munisípiu Manufahi.
“Nu’udar familia maske triste tanba saudozu sai husi moris fatin ba Dili ho isin diak ikus mai fila ho ruin maibé ami nafatin kontente tanba ho nia esforsu tomak bele hamorin uma lisan, aldeia suku no munisípiu Manufahi nia naran”nia dehan.
Saudozuu nia mate iha aldeia Mausoi, suku Tibar, postu administrativu fatin abrigu Boululi iha tinan 1978 hafoin tiru malu ho inimigu iha batalha hetan kanek todan hodi rezulta mate iha ne’eba.
