Manufahi RKM News-—Sexta loron (04/03), Instituto Nasionál Ciensia Tékonolojia (INCT) asina akordu ho Administrasaun Munisípiu Manufahi (AMM) atu hodi halo peskiza ba seitores hotu hanesan eskonomia, kultura, politíka no sira seluk iha munisípiu Manufahi.
Iha ambitu selebra akordu ne’e vise prezidente INCT, Valentin Ximenes hateten, ekipa INCT halo akordu ho administrador munisípiu asina akordu ida nune’e atu hodi halo peskiza ba seitores ne’ebé Manufahi iha.
“Objetivu husi enkontru ne’e atui halo akordu ida entre INCT ho AMM atu hodi halo peskiza iha seitores oioin iha Manufahi nune’e atu fasilita planu dezevolvimentu lokal iha munisípiu hotu inklui Manufahi”dehan, Valentin ba jornalista iha salaun administrasaun munisípiu Manufahi, Sexta (04/03).
Tanba ne’e INCT mai munisípiu atu halo parseiria bo’ot ho administrador munisípiu no prezidente autoridade munisípiu atu hodi halo peskiza konjunta ida iha munisípiu.
“Peskiza refere ho ninia funsaun atu fornese informasaun bazíka ba munisípiu bele halo planu ho didiak tanba iha peskiza ita halibur informasaun husi seitor hotu-hotu no hetan rezultadu mós rai hela iha munisípiu”nia hateten.
Neduni bainhira remata peskiza ekipa sei rai hela iha munisípiu tanba munisípiu mak sai na’in ba dadus ne’ebé ekipa peskizas halo ona nune’e iha futur munisípiu bele halo planu no dezenvolvimentu no implermenta tuir rezultadu peskiza ba ita nia rai sai sidade bo’ot.
“Oras ne’e dadaun ita nia rain iha ona lei poder lokal no poder sira sei intrega tomak mai munisípiu atu munisípiu bhele uza informasaun sira hanesan baze de aranka ida hodi halo dezenvolvimentu iha kraik ho kualidade”nia dehan.
Maske nune’e maib’e peskiza refere sei halo fazeadamente nei-neik nune’e rai hela ba futuru autoridade lokal munisípiu no atu nune’e dadsus labele depende ona ba governu sentral bainhira atu halo planu rasik.
“Iha tinan kotuk ami halo ona peskiza sanolu resin lima (15) iha Manufahi kona-ba turismu no agora ita atu halo tan sanolu resin lima (15) no kuaze ha’at ka lima monu nafatin iha Manufahi neduni peskizador sira iha futuru mai sei iha hotu Manufahi inklui involve mós funsionariu sira ajuda halibur dadus no analiza”nia dehan.
Fatin hanesan administrador munisípiu Manufahi, Arantes Isaac Sarmento, agradese no apresia tebes ba INCT ne’ebé mai halo akordu memoramdum ho munisípiu hodi halo peskiza iha munisípiu Manufahi.
“Peskiza ne’e importante tebes tanba atu hodi bele ajuda munisípiu liliu ba servidor munisípiu hodi bele hatene no hetan dadus refere husi seitores ne’ebé identifikadu iha peskiza”dehan, Arantes.
Arantes hateten, dadus ida ne’e bele ajuda munisípiu hodi halo planumentu ida ne’ebé di’ak hodi kontribui ba dezenvolvimentu rai Manufahi, tanba Manufahi iha potensia bo’ot tebes iha seitor agrikultura, turismu, industria.
“Tanba ne’e ita nia planu labele mehi de’it mak halo maibé ita nia planu presiza baze no baze refere mak hanesan peskiza nune’e iha dadus hodi hamosu planu sustentabilidade di’ak nune’e fó benefisiu ba ita nia povu”nia sublina.
Tanba ne’e nu’udar governu lokal, sei asumi responsabilidade hodi apoiu ba pontus importante ne’ebé ekipa peskiza tanba ida ne’e diak ba povu no diak ba rai Manufahi.(esm)
