Manufahi RKM News- Sesta-feira (25/03) ohin Organizasaun árte marsiaís (PSHT) Persaudaraan Setia Hati Terate (sígla-Indonézia) Munisípiu Manufahi, husu deskúlpa ba autóridade no populasaun sira iha Manufahi, karik membru PSHT balun kría problema iha komunidade nia le’et.
Konselleiru PSHT Munisípiu Manufahi Romeo da Costa Duarte husu deskúlpa iha kongrésu dahúluk PSHT hodi hametin struktura,espíritu Patriotízmu, haburas kultura Fraternidade no Páz, iha sede PSHT Bairo Fataha suku Babulo postu administrativu Same.
Romeo da Costa Duarte, lori grupu PSHT husu deskúlpa ba áktus membru PSHT balun, karik kría problema iha komunidade nia le’et, tanba durante estadu hasai rezolusaun, taka organizasaun PSHT iha Timor leste, strutura la organízadu husi nivel Munisípiu to’o nivel suku no aldeia, atu kontróla membru sira, tán ne’e liuhosi kongrésu ne’e bele hametin fali strutura PSHT nian, hodi kontribui ba páz no estabilidde iha munisípiu ne’e.
Komandante komandu polísia Munisípiu Manufahi, superintendenti polísia Joni Viana das Regras aprésia no kongratúla, gurpu árte marsiaís no árte rituál sira hotu iha Munisípiu Manufahi, durante tinan naruk estadu hasai resolusaun taka arte marsiaís balun iha Timor leste, maibé iha Muisípiu Manufahi árte marsiaís no árte rituál sira, hatudu nafatin unidade hodi kría páz no estabiliade iha Muisípiu Manufahi.
Komandante Joni Viana, agredese ba grupu arte marsiaís no arte rituál sira, konsege kría situasaun hakmatek durante prosésu kampaña to’o elisaun presidensíal la’o susésu no hakmatek iha Munisípiu ne’e, parte polísia nafatin enkoráza grupu arte marsiál no arte rituál sira, kontinua mantein páz no estabilidade, tanba iha fulan Abril nia laran sei iha atividade kompaña eleitorál ba segundu ronde.
Administradór Munisípiu Manufahi Arantes Isaac Sarmento, aprésia tanba grupu arte marsiaís no rituál iha Manufahi, hatudu ezemplu di’ak ba públiku, hodi garantia nafatin páz no estabilidade, ida ne’e maka kultura povu Manufahi nian, hadomi páz no hadomi dezenvolvimentu, tempu ona povu Manufahi sai erói foun ba dezenvolvimentu hodi kore povu Manufahi husi ki’ak no mukit.
Jornalista : Júgu
Editin : Eva
