Manufahi RKM News— tersa-feira (29/03) ohin ,Estudante sira iha iskóla Ensínu sekundáriu tékniku vokasionál São João Maria Vianney (ESTV-SJMV) Same, lamenta maske sira tama iskóla sédu, maibé manórin na’in sira la autoríza tama aúla tuir prosésu prendisajém.
Estudante inisiál RSM no estudante inisiál JEV prímeira kláse lamenta ho situasaun ne’e, tanba maske sira tama iskóla sédu iha tuku 8: 00 dader, maibé odamatan taka ona ba estudante sira no la autoríza tama aúla hodi tuir prosesu aprendizajém, tuir oráriu iskóla nian óras tama iskóla iha tuku 8: 00 dader, maibé estudante sira mai tuku 8:00, iskóla la autoríza tama iha aúla.
Estudante sira mós lamenta manórin na’in sira lori ai báku estudante sira, no obríga sira hakne’ak, bainhira estudante sira la komprí regras iskóla nian.
Iha parte seluk estudante sira kestiona iskóla ESTV-SJMV ne’e, tuir kritéria manorin na’in sira tenki lisénsiadu maka bele hanorin, maibé realidade manórin na’in balun foin semester 4 mós ba hanorin iskóla.
Responde ba lamentasaun hirak ne’e, adjuntu diretór iskola ESTV-SJMV Same, Egídio de Jesús Tilman responde katak, informasaun ne’ebé estudante sira hato’o ne’e la loos, tanba tuir oráriu iskóla nian, iha oras tuku 7:45 dader sínu lian estudante sira hotu tama fórma ona molok tama ba aúla, maibé estudante sira ne’e la kumpri, sínu dere estudante sira seluk tama ona forma, maibé estudante balun hamrik nafatin iha liur, no lakohi tama forma ho estudante sira seluk, kuandu oras tuku 8 : 00 siguransa iskóla taka ona portaun hodi hahú ona prosesu aprendisajém, estudante sira ne’e foin ejiji atu tama iskóla, iskóla ne’e iha regras ne’ebé estudante hotu tenki la’o tuir regras iskóla nian.
Kona ba manórin na’in sira báku estudante no obríga hakne’ak, adjuntu diretór iskola ESTV-SJMV Same ne’e, rekueñese duni situasaun ida ne’e maibé dalaruma de’it , tanba manórin na’in sira koalia de’it estudante sira la kumpri no fila kotuk, maibé la’os hotu-hotu, manorin na’in balun de’it maka lakon pasiénsia ho atetúde estudante sira.
Adjuntu diretór iskóla ne’e, rezeita informasaun kona ba manórin na’in balun semester 4 de’it mai hanorin iha iskóla ida ne’e, ‘’informasaun ne’e laloos”, tanba manorin na’in sira hotu-hotu lisensatúra maka hanorin iha iskóla ne’e,
Entretantu ESTV-SJMV foin lóke iha fulan-Janeiru tinan 2022 ho total estudante ema na’in 122, departementu kontruksaun sivíl, eletrisidade no informátika.(esm&Guterres)
