Manufahi RKM News-Kuarta Loron (30/03),Munisípiu Manufahi oferése ona rai fatin rua iha suku letefoho no suku Daisua ba ministériu Públiku (MP), atu halo kontrusaun edifísiu delegasaun tribunál iha Same, fasilíta no lori justísa besik liu ba povu.
Administradór munisípiu Manufahi Arantes Isaac Sarmento hato’o asúntu ne’e, ba delegasaun ministériu públiku wainhira hala’o audénsia ho admnistradór munisípiu, presidenti konséllu veteranu, komandante polísia, séfi suku no Séfi aldeia husi suku letefoho no Daisua postu administrativu Same iha administrasaun munisípiu Manufahi kona ba planu kontruksaun edifísiu delegasaun tribunál iha munisípiu Manufahi, ne’ebé sei realíza iha tinan 2023.
Administradór Arantes Isaac Sarmento hateten, kona plánu kontruksaun ne’e munisípiu Manufahi oferése ona rai fatin 2 iha Same, ida iha aldeia Rai-úbu suku letefoho ministériu justísa (MJ) atribui ona ba MP, no rai ida seluk iha aldeia loti suku Daisua ne’ebé komunidade rasik entréga rai ektáre 50 iha Luak ba estádu atu harí edifisiu estádu nian, maibé depende ba MP atu desíde rai ne’ebé merese duni atu harí delegasaun tribunál ne’e.
“Kuandu MP deside hili duni rai ne’ebé hetan ona atribuisaun husi ministériu justisa iha tinan 2015 liu ba, aldeia Rai-úbu suku Letefoho, presisa iha tempu badak autoridade munisípiu hamutuk ho MP presisa halo inkontru ida ho komunidade ne’ebé desputa hela rai refere, nune’e bele hetan solusaun molok hala’o kontruksaun”informa Arantes.
Prokuradór distritál Suai Gustávo da Silva, ne’ebé reprezenta prokuradór jerál hateten, MP iha ona despaisu atribuisaun rai estadu nian (eis veternária) iha aldeia Rai-úbu suku Letefoho iha tinan 2015 liu ba atu harí tribunál delagasaun iha Same, maibé tanba iha intervensaun husi komunidade balun kona ba status rai ne’e, entau orsamentu ne’ebé atu harí tribunal delegasaun iha Manufahi nian, la konsege hala’o kontrusaun, MP muda fali ba konstruksaun iha munisipiu Lautem.
“Prokuradór distritál Suai ne’e isplika katak, prokuradór jerál foti ona desizaun kontrusaun delagasaun tribunál ne’e, harí duni iha rai ne’ebé hetan ona despaisu atribuisaun husi ministériu Justisa iha Rai-úbu suku Letefoho, nune’e bele fasilíta no lori justisa besik liu ba povu, tanba durante ne’e povu barak maka infrenta problema oin-oin wainhira prosésa sira nia kázu iha trinunál distritál Suai tanba disntánsia dok.
Diretór servísu dirasaun terres no propríodade Damião Barreto da Costa Araújo hateten, ministériu justisa sei la atribui tán rai iha fatin seluk ba ministériu públiku atu harí delegasaun tribunál iha Same, tanba MJ iha tinan 2015 atribui ona rai estadu nian iha aldeia Rai-úbu suku letefoho ba MP, maske iha intervensaun husi komunidade kona ba rai refere, maibé prosésu sira ne’e liu hotu ona, tanba momentu akontese desputada rai ne’e iha tinan 2015 liu ba, la iha reklamasaun no rekúrsu husi komunidade ba iha MJ, tanba ne’e tuir lei kuandu liu ona loron 15 la iha reklamasaun no rekúrsu entau MJ atribui rai ne’e ba MP.
Presidenti konséllu veteranu munisípiu Manufahi, Tobias Amaral Magno (maksakur) hateten, konséllu veteranu prontu kopera atu harí delegasaun tribunál iha Same, tanba akonetesementu iha tempu hirak liu ba kotuk mosu desputa rai ne’e, dalaruma mós veteranu balun la dún kopera di’ak no kompriende kona ba lei, maibé nu’udar veteranu iha kometmentu obedése ba lei, sasan ne’ebé estadu nian fó ba estadu, no sasán ne’ebé ita nia ne’e ita nian, maske nune’e konséllu veteranu ne’e rekomenda ba autoridade munisípiu no ministériu públiku, presísa halo fali inkontru hodi halo kordenasaun ho komunidade ne’ebé halo intervensaun ba rai estadu ne’e, hodi buka solusaun molok hahú halo kontrusaun ba edifisiu delegasaun tribunál iha rai refere.
Maksakur reálsa katak, presisa duni harí tirbunal delagasaun ida iha Manufahi hodi fasilita prosésu justisa ba komunidade sira, tanba durante ne’e komunidade sira tenki prosésa sira nia kázu iha tribunál distritál Suai defikulta komunidade sira, gasta osan ba-mai, la iha toba fatin inklui transporte.
Séfi suku Suku Letefoho postu administrativu Same, João da Costa Noronha prontu kopera ho autoridade sira, tanba rai (eis Veternária) iha aldeia Rai-úbu tuir evidénsia no istória husi katuas sira katak, rai refere konsidera nu’udar rai estadu husi estadu Portugués-Indonézia to’o ohin loron.
Entretantu liuhosi inkontru ne’e, autoridade no ekipa prokuradór distritál Suai, foti desizaun iha tempu badak sei halo inkontru ho komnidade ne’ebé halo internsaun ba rai iha aldeia rai-úbu hodi buka solusaun, molok atu hahú halo kontruksaun ba edifísiu delegasaun tribunál iha fatin refere. (Esm& Guterres).
