Manufahi RKM News- Kuarta loron (13/04), Sekretáriu tékniku administrasaun Eleitorál (STAE), no Komisaun nasionál eleisaun (CNE) ofisiálmente distribui material sensitívu no la sensitivu ba Munispiu 13 no RAEOA inklui deaspóra, ba eleisaun prezidensiál segúndu vólta iha loron 19 fulan-Abril tinan 2022.
Diretúr jerál STAE Acilino Manuel Miranda Branco, husu autóridade siguransa, autoridade Munisípiu no ekipa téknika Eleitorál sira, atu asegúra material hirak ne’e ho responsabilidade husi Dili ba to’o iha Munisípiu no sei lori hikas hodi hala’o apuramentu nasionál iha Dili ba rezultadu Eleitorál ne’e rasik.
Komandante jerál Polísia nasionál Timor leste, komisáriu Polísia Faustinho da Costa promete, sei asegúra material sensitívu no la sensitivu to’o iha sentru votasaun iha territóriu tomak, no sei lori hikas ba iha fatin apuramentu ho responsabilidade no sei la husik nehek no anin ida atu kona.
Ministériu administarasaun estatal (MAE), Miguel Pereira de Carvalho hateten, governu garantia eleisaun ba segundu volta sei la’o di’ak kompara ho eleisaun primeiru ronde, hodi garantia táza partisipasaun iha eleisaun segundu volta ne’e, parte governu prepara ona transporte públiku hamutuk 100 hodi fasilita eleitór sira ne’ebé atu ba vota iha Munisípiu ida-idak, no eleitór sira ne’ebé naran iha lista sentru votasaun paralelu tuir ona eleisaun iha primeiru vólta kontinua vota iha sentru votasaun paralelu.
Partisipa iha termu intréga material sensitivu no la sensitivu ne’e, orgaun Eleitorál sira, ekipa suksesu kandidátu presidenti Repúblika sira, administardor no presidenti autoridade sira husi Munisípiu 13 no RAEO, autoridade siguransa, inklui observadór eleisaun nasionál no internasionál.(esm& Guterres)
