Manufahi RKM News—Segunda feira (18/04) Sekretáriu tékniku Administrasaun Eleitorál (STAE), hamotuk ho Komisaun Nasional Elisaun (CNE), autoridade seguransa no autoridade Munisipiu ofisialmente transporta material sensitivu no la sentivu ba sentru votasaun 94 ba Elisaun prezidensiál segundu volta ne’ebé sei realiza iha tersa feira (19/04) aban.
Tuir Diretor STAE Munisipíu Manufahi, Angelo da Costa Corte Real hateten, material sensitivu no la sensitivu ne’ebé transporta ba sentru votasaun sia nulu resin ha’at (94) ho estasaun votus atus ida sanulu resin rua (112) ne’ebé iha postu administrativu Alas, Turiskai, Same villa no postu administrative Fatuberlio, munisípiu Manufahi.
“sentru votasaun hirak ne’e ho total livru buletin votus hamutuk atus sia rua nulu resin ualu (928) enkuantu ba eleitores ne’eb’e rejistradu total hamutuk rihun ha’at nulu atus ualu rua nulu resin lima (40.825) maibe iha primeiru ronde eleitores ne’ebé mak la tuir votu hamutuk rihun ualu (8)”dehan, Angelo ba jornalista iha STAE Manufahi, Segunda (18/04).
Tempu hanesan Diretora Komisaun Nasionál Eleisaun (CNE) Munisipíu Manufahi, Melina dos Reis, apela brigadista no Polisia Nasionál Timor Leste (PNTL) komandu polisia Disitritu Manufahi atu asegura transportasaun material refere ho regirozu to’o iha sentru votasaun no fila fali fatin apuramentu municipal hafoin remata elisaun.
“Liu husi ida ne’e atu hodi garantia prosesu tomak iha elisaun hodi fo susesu ba elisaun presidensial segundu ronde iha manufahi”hatete Diretora
Tempu hanesan Komandante komandu polisia distritu Manufahi superintendente polisia Joni Viana das Regras apela ba membru sira ne’ebé halo seguransa atu asegura transportasaun material elisaun ho seguru to’o sentru votasaun hodi garantia sidadaun sira tuir votasaun ho livre.
“Ita tenki garante seguransa aliende ba material sira inklui halo mos seguransa ba komunidade nune’e ezerse diretu iha votasaun ho diak”nia sujere.
Entretantu iha okaziasaun ne’e administrador munisipíu Manufahi, Arantes Isaac Sarmento hato’o agradese ba PNTL,F-FDTL ,STAE,CNE, Veteranus, administrador postu, xefe suku, xefe aldeia hotu inklui ekipa susesu sira tanba iha primeiru ronde la’o ho susesu.
“Maske ita hasoru dezafiu sira hanesan kondisaun estrada dala ruma iha sentru votasaun balun hakat liu mota brigadista sira obrigatoriu tenki hulan urnas maibe ita susesu”nia dehan.
Tuir observasaun jornalista radiu komumnidade iha STAE molok distribui material hirak ne’e, Diretor STAE asina akta termu intrega material sensitivu no la sensitivu ho komandante polisia Manufahi no asiste husi komisaun CNE, administrador munisipiu no hetan mós observasaun husi observsdor internasional Uniaun Europea (UE), PDHJ no hetan supervizaun hosi CNE Manufahi, akompana mós fiskais husi kandidatu presidente republika na’in rua inkliu autoridade sira antes transporta material elisaun nian ba sentru votasaun.(Vasco).
