Manufahi RKM News— Konséllu joventude Manufahi (KJM), lamenta bebé ida mate tán iha munisípiu Manufahi, no ezíji ba servísu saúde munisípal sériu iha prosésu atendementu hodi sálva pasiénte sira nia vída.
Presidenti KJM Lavão Pinheiro, hato’o lamentasaun ne’e iha séntru Maternidade Monaco Same kuarta-Feira (08/06) ohin,nia hateten hanesan konséllu joventude lamentadu tebes bebé ne’ebé partus kontínua mate iha munisípiu Manufahi, husi tinan 2021 to’o tinan 2022, iha tinan kotuk akontese ona bebé mate tanba káuza menus fasilidade, menus komunikasaun, no menus rekúrsu, entau tinan ne’e saúde tenki fó príoridade tau orsamentu hodi rezólve, nune’e la repéte tán situasaun ne’ebé hanesan ho tinan kotuk.
Tuir Lavão katak, dadaun ne’e rekúrsu umánu sufiénte,destakamentu pesoál saúde ba postu saúde sira iha ka lae, programa saúde na familia iha, governu aplika tán rejíme spesiál ba pesoál saúde sira, tán sá mortalidade bebé nafatin ás iha Manufahi, parte saúde tenki sériu no tenki iha spiritu nasionalízmu hodi serví no Sálva povu nia vída.
Administradór munisípiu Manufahi Arantes Isaac Sarmento, liuhosi vía telemóvel hato’o lamentasaun ba situasaun ne’ebé kontinua mosu iha munisípiu Manufahi ‘’no presísa halo investigasaun’’,hodi hadía servisu saúde munisípiu Manufahi nian, parte administrasaun dadaun ne’e hein hela relatóriu eskríta husi servísu munisípal ba situasaun ne’ebé mosu, hodi lóke prosésu investigasaun, ho nune’e iha tempu badak administradór munisípiu rasik sei konvóka inkontru ho dirjénti no médiku sira hodi buka solusaun.
Arantes reálsa, ninia parte hetan ona esplikasaun husi parte saúde katak situasaun ne’e mosu, tanba razaun problema fasilidade la sufisiénte, desizaun familia lori pasiente ba óspitál tarde no problema seluk tán, hanesan autóridade másimu iha munisípiu ne’e hein hela relatóriu husi parte saúde hodi buka solusaun.
Governu estabeleze ona programa vizíta saúde na familia, ida ne’e parte ida atu hala’o tratamentu saúde direita ba komunidade sira iha aldeia no suku, nomós atu hasa’e konsiénsia komunidade nian, maibé akontese bebé ida mate tán, ida ne’e situasaun ida ne’ebé la iha mudansa, no hanesan autóridade lamentádu tebes ho situasaun ne’e, hanesan funsionáriu tenki korízi ninia an hodi présta servísu ne’ebé di’ak liu ba komunidade sira, tanba ne’e hanesan autóridade másimu sei buka mekanismu hodi hadia servísu iha parte saúde nian,’’informa Arantes’’.
kordendór Saúde na Familia munisípiu Manufahi no kordendor Médiku munisípal, Dotór Nélson Magno Neno Bento informa katak, parte saúde halo ona autópsia verbál ba kázu inan partus ne’ebé mate iha postu Fatuberliu foin lalais, prosésu autósia verbál ne’e la’os atu kéiza ema ruma, maibé atu hadia sistéma servisu saúde nian ba komiunidade sira, entau rezúltadu autópsia verbal ne’e detekta katak, atrázu prímeiru desizaun familia lori pasiente ba ospitál maka tarde,atrázu segúndu pesoál saúde no ekipamentu atu fasilita ba prosesu atendementu, atrázu terseiru maka problema trasnsporte.
Dotór Neno reálsa, programa na Familia dadaun ne’e la’o hela halo konsulta ba inan isin rua sira, no hasa’e konsiénsia komunidade nian, maibé iha fulan rua ba kotuk minimíza nia atividade tanba fóku liu ba vasinasaun covid-19 ba komunidade sira, tanba atu hasa’e kobertura prosesu vasinasaun, no médiku sira mós hetan ona formasaun lubuk ida, husi institútu nasionál Saúde (INS),kona ba partus mos no segúru no atendementu ba bebé sira,nune’e bele fó prestaun servísu ne’ebé di’ak liu ba komunidade sira iha Manufahi.
Entretantu mortalidade inan no bebé husi fulan-Janeiru to’o fulan-Juñu 2022, bebé mate na’in 3 no inan partus na’in 2 maka mate, no kuarta-feira madrugada ohin, akontese tán bebé ida mate tanba partus.(Guterres)
