Manufahi RKM News— segúndu-feira (13/06) ohin, Arafura and Timor Seas (ATSEA), realiza diálogu ho autóridade Munisípiu,lideransa komunitária, peskadór no Komunidade sira iha Betano, atu konserva rikusoin tasi iha area Munisípiu Manufahi.
Kordenadór programa área protesaun Marine Munisípiu Manufahi, Almerindo Oliveira hateten, objetivu diálogu ne’e ekipa ATSEA rejionál sei rekólla ideias husi autóridade no Komunidade sira, oinsá atu konserva rikusoin tasi Timor nian, tanba Munisipiu Manufahi hanesan Munisipiu primeira iha Timor leste, ATSEA identifika atu implementa programa konservasaun rikusoin tasi Timor nian.
Tuir Almerindo katak, area tasi Munisípiu Manufahi identifika iha rikusoin ne’ebé uniku tebes, liliu kona ba ikan oin-oin no ahu-ruin ne’ebé presisa halo konservasaun hodi atrai turistíka, tanba Timor leste hanesan membru ATSEA husi nasaun 4 hanesan Austrália,New Zelándia, Indonézia no Timor leste serbisu hamutuk hodi konserva rikusoin iha tasi laran.
Kordenadór rejionál ATSEA Handoko afirma katak, ami nia presensa ne’e atu halo kordenasaun serbisu hodi halo konservasaun ba rikusoin tasi Timor nian, tanba serbisu hamutuk sai sáve importante hodi konserva ikan inklui ahu-ruin iha tasi laran, tanba ikan hias no spesie oin oin iha tasi Manufahi nian uniku ne’ebé presisa konserva.
Peskadór Francisco Suri sente kontenti ho programa ida ne’e, espera bele implementa lalais, tanba durante ne’e nudar peskadór hatene de’it maka kaer ikan maibé la hatene ikan oin oin ne’ebé moris iha area tasi Manufahi nian, nune’e peskadór sira mós bele konserva ba ikan ne’ebé presisa kaer no ikan ne’ebé presisa konserva.
Administardór Munisípiu Manufahi Arantes Isaac Sarmento, agrade ba ekipa rejionál ATSEA bele hili área tasi Manufahi nian, hodi implementa programa área konservasaun marina, nune’e bele halo peskiza no identifika ikan oin-oin ne’ebé moris iha tasi husi area Fatuberliu, Alas no Same nian, tanba iha area Wedauberek identifika iha ikan Salomo ne’ebé nia folin Dollar Amérikanu $ 1,000.00, tanba ne’e liuhusi koperasaun ne’e ita bele halo konservasaun ba rikusoin iha tasi Manufahi nian(ekipa Jornalista)
