Mnufahi RKM News- Kinta (08/09 )ne’e Ministério Solidaridade Sosíal no Inkluzaun (MSSI) realiza dialogu ho tema “Promove partisipasun feto iha prosesu hari paz no seguransa nu’udar meius hametin harmonia no Kuauzaun sosiál”.
Diretora Sentru Solidaridade Sosial Munisípiu Manufahi (SSSMM), Eulalia Maria de Jesus Cesar hateten, objetivu husi dialogu ne’e atu fó hanoin ba komunidade liliu ba feto maluk sira kona-ba feto paz no seguransa.
Nia hateten, dialogu ne’e ligadu ba problema ne’ebé komunidade infrenta durante ne’e iha suku Tutuluru, postu administrative Same villa ,munisípiu Manufahi.
“Objetivu husi dialogu ne’e atu promove feto sira hodi hatene did’iak programa feto paz no seguransa sosial nune’e komunidade bele iha koñesementu kle’an hodi hatene saida mak feto paz no seguransa social”dehan Eulalia ba jornalista iha Tutuluro,
Tanba liu husi dialogu sira feto bele iha koñesementu hodi fó kontribuisaun ba prevene konflitu sira iha komunidade nia le’et.
“Aktividades ne’e ministeriu la’ós halo deit iha suku Tutulurio maibé antes ne’e realiza ona iha postu Turiskain, Alas, no suku Holarua no suku Rotutu, postu administrativu Same”nia akresenta.
Diretora ne’e sublina, dialogu refere bazeia ba asesmentu ne’ebé tékniku SSSMM serbisu hamutuk ho lider komunitáriu suku hodi hare situasaun ne’ebe real duni hodi difikulta ba komunidade nia moris ligadu ba problema sosiál no violensia domestika, disputa rai no mós ligadu ba konflitu em jeral ba komunidade.
Portantu Tuir Eulalia, durante ne’e suku Tutuluro seidauk rejistu númeru violensia domestíka ne’ebe a’as tanba hetan atendimentu masimu husi tékniku SSSMM bainhira hetan kazu ruma.
Entretantu partisipa iha dialogu ne’e mai husi komunidade no autoridade suku Tutuluro ho estrutura tomak inklui joven feto no mane.(Aa/JB).
