Manufahi RKM News—Komunidade suku Aituha, Uma Bereloik, Mahakidan, Dotik no suku Taitudak, Postu administrativu Alas, Munisípiu Manufahi deklara area liman mo’os(ALMO) nivel postu administrativu ba postu hijiniu.
Antes ne’e iha fulan-Outubro tinan 2019 Munisípiu Manufahi deklara ona Área La Soe Arbiru (ALFA) nune’e autoridade Munisípiu Manufahi deside Postu administrativu Alas hanesan postu pilotu ba implementasaun polítika saneamentu báziku ba eskada tolu hanaran suku ka postu hijiniu no Manufahi hanaran Área Liman Mo’os (ALMO).
Liu husi aktividade oioin iha tinan 2019 liu no iha tinan 2022 determina ona rezultadu ho pursentu 94,7% sentina melloramentu no pursentu 5,3% mak seidauk melloradu no hare ba persentajen postu Alas bele deklara ona nu’udar postu hijiniu ka Area Liman Mo’os (ALMO).
Tanba ne’e ohin ofisialmente postu Alas Deklara ba públiku Area Liman Mo’os (ALMO) suku ka postu hijiniu.
Iha seremonio ofisiál deklara postu hijiniu ne’e, administrador munisípiu Manufahi, Arante izaak Sarmento hateten, Iha Timor-Leste Manufahi deklara ba daruak lori postu administrativu Alas tanba deklara primeiru Atabae.
“Ohin ita deklara ALMO Postu hijiniu, iha postu administrativu Alas deklara ALFA mós dahuluk no deklara fali ALMO Alas, ida akontese tanba ita bo’ot sira nia kontribuisaun, kolaborasaun ho prestasaun serbisu ne’ebé di’ak” Dehan Arante iha Alas, Kuarta ne’e.
Nia hateten komunidade postu Alas sai ezemplu, tanba atu kria ambiente ne’ebé mo’os la presiza estadu, atu hamo’os uma oin la presiza estadu maibé tenki iha konsiensia rasik hodi hadok a’an husi moras.
Fatin hanesan Administrador postu Alas Leopoldo Barreto Argumenta, deklara ona postu hijiniu kada uma kain tenki ke’e rai kuak iha uma sorin hodi halo’ot no asegura foer sira labele namkari, tenki hamo’os animal nia foer, be’e foer sira bainhira uza tenki iha rai kuak hodi labele haki’ak susuk no kria dois.
“Hoje dia 21 Setembru de 2022, celebramos mais uma passo importante de saneamentu i hijiene comunitario ao declarar posto administrativo Alas, e postu hijiene ou area Liman Mo’os (ALMO) para o posto administrativo Alas municipio de Manufahi”Leopoldo deklara.
Nia dehan, postu Alas situasaun bele mudansa maibé rezolusaun númeru 08/2014 la iha mudansa no dekreitu lei númeru 04/2004 seidauk revoga no sei mantein. Neduni tenki tau matan nafatin ba sistema be’e rural ne’ebé halo serbisu ho SAS iha area urbana tanba postu Alas sei iha hela eskada livre husi be’e foer” nia sublina
Administrador postu ne’e rekoñese molok postu Alas susesu ba deklara ALMO maibe luta maka’as ne’e husi NGO lokal Fundasaun Luta Ba Futuru(F-LBF) no luta ba mudansa(LBM) tanba durante ne’e halao aktividade tama uma sai uma iha komunidade nia le’et.
“Progresso ne’ebé akontese iha postu liu husi kooperasaun di’ak ho ajensia internasionál waterAid Timor-Leste(WATL), Care internasionál Timor-Leste(CITL) no sira seluk inklui NGO lokal LBM ho F-LBF ne’ebé fó apoiu ba implementasaun programa tomak iha terenu to’o ohin loron ami deklara postu hijiniu”nia hateten.
Tempu hanesan sekretáriu ALMO postu Alas, Atual Diretora ezekutivu Fundasaun Luta Ba Futuru (F-LBF), Maria Boki Doloroza apresia, programa ne’ebé importante durante ne’e hetan fundus husi projetu “Be’e Ba Feto” husi WaterAid Austrália iha Timor-Leste.
“Apoiu ne’e ita hodi halo implementasaun programa tolu hanesan kampaña polítika saneamentu báziku kontinua deklara ALMO, fornese Be’e saneamentu no hijiniu (BESI) ba komunidade rural no eskola sira” nia relata.
Nia esplika, programa refere atu hakbesik komunidade liuliu feto, labarik no ema difisensia ba BESI iha komunidade rural, eskola sira, promove mudansa hahalok hodi priense eskada ALMO iha postu Alas, postu Turiskain no suku Holarua, postu same, promove hasae konsiensia komunidade trarjeitu ba jestaun rekursu be’e matan inklui haforsa sistema BESI iha Munisípiu ba kordenasaun, Monitorizasaun no evaluasaun ba Planu estratéjiku munisípiu (PEM).
Enkuantu tuir xefe sentru saúde postu Alas, José da Costa Martins afirma, programa Area La Soe Foer Arbiru no Area Liman Mo’os(ALMO) kontribui tebes ba moras diarea, te’en be’e no sira seluk.
Tamba hafoin postu Alas deklara Area La Soe Foer Arbiru (ALFA) kazu moras diarea ba atus ba atus 800 Reduz ba 300.
Fiar katak ho deklarasaun Area Liman Mo’os (ALMO) bele kontribui di’ak liu tan ba moras diarea husi atus 300 ba kra’ik iha Alas tanba ita hare katak komunidade iha ona konsiensia hodi uza fasilidade saúde no fasilidade fase liman” nia sira.
Tanba ne’e parte saúde rekoñese programa ALFA no ALMO kontribui tebes ba reduz moras sira ne’ebé rejista ona kazu iha postu Alas.
“Durante komunidade balun ninia sentina seidauk iha melloradu nune’e pesoal saúde tun diretamente ba halo promosaun kona-ba halo sintina no tau fasilidade fase liman ho sabaun” nia hakotu.
Partisipa iha deklarasaun ALMO ne’e husi reprezentante Ministeru saúde atual xefe departamentu vijilansia sanitaria saúde ambiental, country Diretor WATL, CITL Diretora saúde munisípiu, administrador postu fatuberliu, reprezentante husi postu Turiskain, diretores serbisu liña sektorais, munisipais no xefe suku sira inklui estadu eskola sekundaria Katólika Santo António Alas.
Entretantu hafoin lansamentu deklara ALMO entrega mós prezenti hanesan kadeira, meja no armariu hodi rai dokumentu administrasaun suku nian ba autoridade suku Mahakida, Aituha, Taitudak, Uma Bereloik no suku Dotik.(AA)
