Manfuahi RKM NEWS SEXTA loron (09-06),Ministru Asúntu Parlamentár Komunikasaun Sosial (MAPKOMS) no Ministra Saúde (MS), inagura sentru informasaun suku Fatucalo postu administrativu Turiscai.
MAPKOMS Jerónimio Francisco Martins da Costa Pereira Jeronimo hateten, Oitávu Governu instala tan sentru informasaun ida iha Fatucalo, ho objetivu atu promove suku Fatucalo liuhusi informasaun, tanba sentru informasaun ne’e sai hanesan meius informasaun ida ne’ebé, atu rekólla no públika hodi promove suku Fatucalo iha setór oin-oin ba públiku.
Responde ba pedidu husi Administradór Munisípiu Manufahi nian, atu instala tan sentru informasaun ida iha postu Alas, tanba iha postu administrativu Same, Fatuberliu inklui Postu Turiscai instala ona.
Governante ne’e akresénta katak, Maske Oitávu governu remata ona ninia mandatu, maibé ha’u orenta hela diretur sira, atu kontinua Dezenvolve no instala tan sentru informasaun suku iha postu Alas, iha mandatu governu dá-sía.
Administradór Munisípiu Manufahi Arantes Isaac Sarmento, agradese ba Oitávu governu konstitusionál, ne’ebé lideradu husi maun bo’ot Jenerál Taur Matan Ruak, liuhusi MAPKOMS no Ministra Saúde, maske atu remata ona nia mandatu, maibé nafatin asúme responsabilidade hodi mai vizita populasaun sira iha suku Fatucalo, hodi inagura sentru informasaun iha suku Fatucalo.
Arantes subliña, Munisípiu Manufahi Oitávu governu instala ona sentru informsaun suku iha postu administrativu 3, Postu administrativu Same iha Suku Rotuto, Postu Administrativu Fatuberliu iha suku Bubususu, no Postu Administrativu Turiscai iha suku Fatucalo, sei hela tan Postu administrativu Alas maka seidauk instala, tanba ne’e rekomenda ba MAPKOMS atu instala tan sentru informsaun ida iha suku Alas.
“Sentru informsaun ne’ebé instala ona hatudu nia progrésu no lori governu besik liu ba povu, tanba ne’e iha suku Fatucalo inagura ona sentru informsaun ida ne’e, sedu ka tarde komunidade iha suku refere sei hetan estrada no eletrisidade, tanba povu iha direitu atu hetan eletrisidade, estrada, bee moos, eduksaun, saúde no Dezenvolvimentu sira seluk, Arantes hakotu “.
Entertantu partisipa iha serimónia inagurasaun ne’e, repzentante konsellu Imprénsa (KI), autóridade Munisípiu no postu, lideransa komunitária, manórin na’in ni alunu sira, foinsa’e no komunidade sira
