Manufahi RKM News=====Sidadaun na’in 44 ne’ebé positivu no izólamentu iha Same, sidadaun na’in 42 rekopera no re-integra ona ba Família.
Diretóra Servisu Munisípal Saúde Munisípiu Manufahi, Florencia Corte-Reál Tilman segunda-feira (10/05) ohin informa, sidadaun na’in 44 ne’ebé positivu no tama iha fatin izólementu kajerna polísia Holarua-Same, sira nia rezultadu teste SWAB hatudu negativu, tanba ne’e iha Sesta-feira (07/05) foin lalais re-integra ona ba familia,no sidadaun na’in 2 sei kontinua iha fatin izólamentu hodi halo observasaun.
Iha sábadu (08/05) fin semana médiku sira detekta tan negosiante 1 positivu, tanba sidadaun ne’e atu ba Dili to’o iha Maubesi hasai teste SWAB rezultadu positivu, médiku sira transporta kedas mai iha fatin Izólamentu Same, tanba ne’e sidadaun positivu na’in 3 maka dadaun ne’e tama iha fatin izólamentu Same.
Diretóra Saúde ne’e isplika, ba negosiante ne’ebé detekta positivu, parte Saúde orenta kedas ekipa médiku sira segunda-Feira (10/05) ohin, halo kedas teste SWAB ba ninia familia sira iha áreadores merkadu Same.
Nune’e mós responsavel médiku pilar 3, dotór Aquino Marques Sarmento informa, médiku halo ona teste SWAB ba ema na’in 8, núdar familia husi negosiante Merkadu Same nian ne’ebé detekta positivu, no ekipa médiku rekomenda ba sidadaun na’in 8 ne’e, atu hakmatek iha sira nia uma inklui sira nia atividade negósiu iha Merkadu Same provizório taka, hodi hein rezultadu teste SWAB.
Dotór Aquino informa, kuandu rezultadu teste SWAB negativu sidadaun sira ne’e bele hala’o hikas ninia atividade negósiu, maibé bainhira positivu médiku sira sei halo teste SWAB mós ba sidadaun sira ne’ebé halo kontaktu besik ho negosiante ne’ebé detekta positivo,(rkm)