Manufahi RKM News ===== Presidente da Repúblika Francisco Guterres Lú-Olo ho espóza sei vizíta munisípiu Manufahi durante Loron 3 hahú loron 16 to’o loron 19 fulan Agustu tinan ne’e.
Kordenadór ekipa prezidénsia da repúblika, tráta asuntu vizíta presidenti da repúblika ba Munisípiu Armindo dos Santos hato’o asuntu ne’e, iha enkontru kordenasaun no preparasaun vizíta presidenti da repúblika, ho autóridade munisípiu Manufahi iha salaun administrasaun munisípiu Sesta-feira (30/07)
Armindo dos Santos hateten tuir lolós presidenti da repúblika halo ona vizíta iha fulan-Fevereiru liu ba maibé kanséla tanba pandémia covid-19, tanba ne’e tuir data tentatíva ne’ebé aprezenta ona ba presidenti da repúblika iha loron 16 to’o loron 19 fulan oin, presidenti da repúblika ho espóza sei halo vizíta iha Manufahi.
Armindo dos Santos isplíka katak iha vizíta ne’e presidenti da repúblika sei halo díalogu no rona direitamente husi komunidade sira liga Infrastrutura,Saúde,Edukasaun no setór produtívu sira seluk ne’ebé sai preukupasaun ba komunidade sira,Xéfi Estadu mós hakarak rona direitamente husi autóridade kona ba progrésu dezenvolvimentu munisípiu nian, tanba oramentu gerál du estadu tinan 2021 ne’ebé presidente da repúblika rasik promúlga ba iha munisípiu Manufahi ho montante osan dollar Amérikanu $ 4,5 juta, Objetivu seluk ba vizíta ne’e atu enkóraza komnidade sira protéze meiu ambiente,Enkoráza mós grupu produtór sira, inklui halo vizíta mós ba iskóla no sentru saúde iha Manufahi Hateten Armindo.
Fatin hanesan komandante komandu polísia munisípiu Manufahi, superintendenti polísia Joni Viana das Regras hateten Polísia Manufahi garantía fó siguransa ne’ebé adekuadu vizíta presidenti da repúblika nian iha munisípiu Manufahi.
Nune’e mós diretór Fískalizasaun administrasaun munisípiu Filomeno Amaral, ne’ebé reprezénta administradór munisípiu Manufahi agradese ba ekipa prezidénsia da repúblika realiza inkontru ne’e ba dala 3 ona,kona ba preparasaun no halo survei ba vizíta presidenti da repúblika nian iha munisípiu Manufahi.
Entretantu ba tinan ida ne’e presidenti da repúblika sei hala’o vizíta ba munisípiu 6, vizíta dahuluk iha munisípiu Manufahi, iha tinan 2020 presidenti repúblika halo ona vizita ba munisípiu 5 hanesan Viqueque, Covalima,Lautem, Baucau no Ermera.(RKM)
