Sorumutuk Estraordináriu Konsellu Ministrus nian iha loron 20 fulan-fevereiru tinan 2023
Konsellu Ministrus hala’o sorumutuk iha Palásiu Governu, iha Dili, no, liuhusi projetu ne’ebé aprezenta husi Ministru Finansas, Rui Augusto Gomes, delibera ona atu aprova partisipasaun Open Government Partnership no dezigna membru Governu ne’ebé responsavel iha área finansas hanesan ninia reprezentante.
Open Government Partnership ne’e hanesan inisiativa multilaterál ida, ne’ebé lansa iha fulan-setembru tinan 2011, ho objetivu atu garante kompromisu konkretu Governu sira nian ba promosaun transferénsia, fomentu partisipasaun públika, kombate ba korupsaun no utilizasaun teknolojia foun ba fortalesimentu demokrasia partisipativa.
Inisiativa ida-ne’e apoia reforma iha nivel governamentál no sosiedade sivil iha país membru sira liuhusi asisténsia ba planeamentu no implementasaun ba planu asaun sira, no fasilita atu fahe esperiénsia no informasaun iha nivel rejionál no globál ho forma atu permite aprendijazem ho par sira.
Iha loron 28 fulan-novembru tinan 2022, Open Government Partnership avalia ona atu kumpri kritériu partisipasaun nian husi parte Timor-Leste, ne’ebé rezulta iha klasifikasaun mínima husi 75% ne’ebé konklui katak Governu Timor-Leste elejivel atu partisipa iha inisiativa multilaterál ida-ne’e.
…
Konsellu Ministru delibera, mós tuir projetu ne’ebé aprezenta husi Ministru Rui Gomes, atu aprova Akordu Projetu entre Repúblika Demokrátika Timor-Leste no Ajénsia Kooperasaun Internasionál Koreia Sul (KOIKA) kona-ba projetu “Strenghtening the Preparedness and Response to Infectious Disease in Timor-Leste”. (Fortalesimentu Preparasaun no Resposta ba Moras Infesioza sira iha Timor-Leste). Konsellu Ministrus delibera ona mós atu dezigna Ministru Finansas atu reprezenta Governu Timor-Leste, hodi asina akordu ne’e.
Tuir akordu ida-ne’e, KOIKA kompromete atu halo kontribuisaun finanseira ida ho montante to’o dolar amerikanu millaun neen, ne’ebé sei utiliza atu hametin preparasaun no resposta ba moras infesioza (moras ne’ebé hadaet lalais) sira iha Timor-Leste, liuhusi reforsu kapasidade atu deteta, notifika no hatán iha nivel hotu-hotu, tuir tempu ne’ebé loloos ba eventu no surtu sira moras infesioza prioritária sira nian, nune’e mós liuhusi preparasaun husi espesialista nasionál sira ba iha área ida-ne’e.
…
Konsellu Ministrus delibera atu autoriza Ministru Finansas, Rui Augusto Gomes, hodi hahú halo negosiasaun ho Banku Mundiál (Asosiasaun Internasionál Dezenvolvimentu) kona-ba kondisaun espesífika husi empréstimu ba projetu “Timor-Leste Healthcare Action Through Rapid Infrastructure Improvements” – “HARI’I” (asaun kuidadu saúde iha Timor-Leste liuhusi Melloras Rápidas iha Infraestrutura).
Governu hakarak ho deliberasaun ida-ne’e atu mobiliza asisténsia finaseira nesesária, iha forma empréstimu, ho objetivu atu hametin infraestutura saúde nune’e mós sistema referénsia entre unidade saúde munisipál no iha sentru ospitalár sira.
…
Tuir projetu ne’ebé aprezenta husi Ministru Obras Públikas, Abel Pires da Silva, Konsellu Ministru delibera atu aprova prosedimentu aprovizionamentu sira ba reabilitasaun estrada munisipál sira, relasiona ho Pakote 8 Sesaun Aileu (Be’kluru) – Likidoe (ICB/089/MOP-2022) ho montante ne’ebé prevee maka dolar amerikanu millaun 24,2 , no ba Pakote 11 Sesaun Sidade Maliana (ICB/088/MOP-2022) ho montante ne’ebé prevee maka dolar amerikanu millaun 21,2.
…
Ikusliu, aprova ona projetu Rezolusaun Governu nian, neébé aprezenta husi Vise-Primeiru Ministru no Ministru Planu no Ordenamentu, José Maria dos Reis, kona-ba medida kautelár sira ba sidade administrasaun foun.
Nune’e Governu determina katak to’o tama iha vigór Planu Urbanu Dili, ho limite másimu tinan rua, prorogavel ba tinan rua tan, no to’o deklarasaun utilidade públika husi terenu ne’ebé integra iha zona ne’ebé rezerva atu harii sidade administrativa foun, iha Metinaru, bandu asaun hirak iha área refere tuir mai ne’e, haree ba ninia objetivu:
Operasaun loteamentu no obras urbanizasaun, konstrusaun, ampliasaun, alterasaun no rekonstrusaun, ho esesaun neébé isenta husi kontrolu administrativu préviu;
Serbisu remodelasaun iha terenu;
Obra domolisaun edifikasaun ne’ebé eziste, exetu ne’ebé isenta husi kontrolu administrativu préviu; no
Tesi ai-hun no destruisaun ba rai moris no taka vegetál. REMATA
