Manufahi RKM News – kuarta feira ohin Asosiasaun Kafé Timor (ACT) Ministériu agríkultura peskas, no autóridade Munisípiu Manufahi halo lánsamentu distribuisaum pagamentu ba orsamentu purséntu 40 ba programa podájem kafé ektáre 1.300 iha Munisípiu Manufahi.
Diretúr servisu agrikultura Munisipiu Manufahi Aurelio dos Santos Marques hsteten kafé iha área Munisípiu Manufahi ho totál ektáre 6.74 maiória purséntu 75 maka tuan ona no la produktivu, entau presisa halo rehabilitasaun tesi kafé tuan ektáre 500 kada tinan, hodi fo vantajen ba kafé foin sa’e hodi fó fali produsaun di’ak no kualidade.
“ Maibé realidade husi tinan 2016 to’o 2022 rehabilitasaun kafé iha Munisípiu atinji de’it 91,5 ektáre kada tinan, ne’e sai preukupasaun ba Munisipiu hotu, maibé ita agradese ba oitávu governu konstitusionál, prevé ona orsamentu ratifikativu hodi halo rehabilitasaun kafé ektáre 8.000 iha Timor leste.
“Podájem kafé ektáre 1.300 iha Munisípiu Manufahi, fahe ba postu administrativu Same ektáre 700, maibé nia progrésu la’o lentu tebes foin atinji purséntu 10.
Postu administrativu Turiscai rehabilitasaun kafé ektáre 500 finaliza ona purséntu 100 tanba Administardór postu tun direita iha terenu motíva agríkultór sira halo podájem kafé, no postu Fatuberliu rehabilitasaun kafé ektáre 100 informa Aurelio.”
Xefe departamentu Floresta plantas no industeeia Johanes dos Santos C.Soares hateten programa rehabilitasaun no ekstensaun kafé inisia iha tinan 2022 no aprova husi Konséllu minístru ho dekrétu lei 28/2022 loron 19 fulan-Maiu ho totál orsamentu 6 miloens resin, maibé minístru agríkultura hetan de’it miloens 4 resin, hodi halo rehabilitasaun kafé ektáre 8.000 iha Munisípiu 7 no restu alóka ba (MCI).
Sorin seluk Presidenti Asosiasaun kafé Timor (ACT) Evangelino Monteiro hateten aprésia ba ekipa tékniku sira ne’ebé kopera di’ak tebes hodi halo rehabilitasaun kafé iha teritóriu tomak
Nune’e mos Administardór Munisípiu Manufahi Arantes Isaac Sarmento agradese ba oitávu governu tanba tau ona priodade ba programa rehabilitasaun kafé atu garantia kualidade produsaun kafé Timor, tanba kafé Timor nu’udar identidade Timor – leste iha Mundu.
Administradór ne’e afirma tan husu ba kafé na’in sira uza osan $340.00 ho responsabilidade atu hadia fali kafé ne’ebé tuan ona ,nune’e bele hasa’e produsaun kafé ho kualidade, la’ós uza fali osan ne’e ba halo fali lia no sosa telemóvel.
“Agríkultór Bernardino Corado husi aldeia Berteni suku Rotuto postu administrativu Same sente kontenti no agradese ba oitávu governu konstitusionál, bele ajuda osan ba ami agríkultór sira, hodi hadia ami nia kafé, tanba ami nia kafé tuan ona
no ami la iha kb’it atu halo rehabilitasaun, ho osan ne’ebé ami simu hus governu ami bele selu fali komunidade sira, hodi hadia ami nia kafé.(mery&senya)
