Manufahi RKM NEWS-domingu (14/5) ne’e aldeia Furaklau no Aldeia Laclo suku Aitemua, postu administrativu Turiskai, munisípiu Manufahi, preokupa ahi lakan mate hahú iha loron 5 fulan-Abril too ohin loron 14 fulan-Maiu ahi kontinua mate.
Ba jornalista RKM, António Soares Bareto husi suku Aitemua AldeiaFuraklau, postu administrativu Turiskai haktuir, ahi ne’ebé governu ho kompaña halo lakan iha inisiu moris diak maibé ikus ahi mate to’o agora.
“Ami preokupa tebes ho ahi ne’ebé iha suku Aitemua liliu aldeia Furaklau ahi mate Tama Fulan Ida Ho resin ona maibé ahi seidauk lakan” dehan António ba RKM
Nia dehan, nu’udar komunidade preokupa ho ahi mate tanba afeita labarik sira estuda iha tempu kalan, bainhira labarik eskola simu traballu ruma sira labele halo iha tempu kalan tanba ahi mate.
“Ho ida ne’e ami rekomenda ba Eletrisidade de Timor-Leste Empreza Públiku (EDTL-EP) munisípiu Manufahi atu tau atensaun ba ida ne’e tanba komesa ahi mate to’o agora EDTL-EP ida la mai hare” rekomenda António.
Responde ba preokupasaun ne’e Diretór EDTL-EP Munisípiu Manufahi, Julio Pacheko Pinheiro responde, ahi mate iha suku Aitemua tanba udan bo’ot liu ba rai lakan dala ruma fera tiha asessores balun mak halo ahi la lakan.
Maibé obra ne’e EDTL-EP seidauk bele ba halo kontrolu tanba sei responsabiliza hela iha kompañia no kompania seidauk entrega sem pursentu 100% ba EDTL-EP.
“Tanba ne’e foin lalais ha’u kontaktu ona ba kompañia hodi orienta tékniku ba hadia lalais tanba atu tama ona ba eleisaun parlamentár no kompania orienta ona tékniku ba maibé tanba udan nune’e sira hein loron foin ba hadia” nia dehan.
Molok hakotu nia dehan, bainhira obra kompania entrega mai EDTL-EP ne’e ita bele tun diretamente ba hadia bainhira hetan avaria ruma
To’o Noticia ne’e fó sai jornalista seidauk halo konfirmasaun ho kompañia ne’ebé responsabiliza.
Portantu lina eletrisidade ba suku Aitemua sei responsabiliza hela husi kompañia implementador Aitemalau-Tarutu Unip Lda JV Delta-Mola Unip Lda(esm).
