𝐀𝐍𝐈𝐍 𝐅𝐑𝐄𝐒𝐊𝐔 𝐍𝐎 𝐄𝐒𝐏𝐄𝐑𝐀𝐍𝐒𝐀 𝐁𝐎𝐎𝐓 𝐁𝐀 𝐑𝐓𝐓𝐋, 𝐄𝐏, 𝐎𝐅𝐄𝐑𝐓𝐀 𝐔𝐒$𝟓,𝟗𝟕𝟎,𝟔𝟓𝟗.𝟏𝟏 𝐇𝐔𝐒𝐈 𝐉𝐀𝐏𝐀𝐔𝐍

𝐃𝐈𝐋𝐈, 𝟏𝟏 𝐀𝐠𝐨𝐬𝐭𝐮 𝟐𝟎𝟐𝟑 – Governu Japaun fo apoiu osan hamutuk US$5,970,659.11 liuhusi UNDP iha Timor Leste ba harii edefísiu Rádio Televizaun Timor Leste, Empreza Públika (RTTL, EP).
Prezidente Repúblika 𝐉𝐨𝐬é 𝐑𝐚𝐦𝐨𝐬 𝐇𝐨𝐫𝐭𝐚, Sekretáriu Estadu Komunikasaun Sosiál 𝐄𝐱𝐩𝐞𝐝𝐢𝐭𝐨 𝐃𝐢𝐚𝐬 𝐗𝐢𝐦𝐞𝐧𝐞𝐬, Reprejentante Organizasaun Nasoens Unidas (ONU) iha Timor Leste 𝐅𝐮𝐧𝐦𝐢 𝐁𝐚𝐥𝐨𝐠𝐮𝐧 ho Prezidente RTTL, EP 𝐉𝐨𝐬é 𝐀𝐧𝐭ó𝐧𝐢𝐨 𝐁𝐞𝐥𝐨 sai sasin ba serimónia asinatura nota entendimentu entre Embaixadór Japaun iha Timor Leste 𝐊𝐢𝐦𝐮𝐫𝐚 𝐓𝐞𝐭𝐬𝐮𝐲𝐚 ho Reprezentante Rezidénsia UNDP 𝐀𝐝𝐞𝐥𝐢𝐧𝐞 𝐂𝐚𝐫𝐫𝐢𝐞𝐫.
Sekretáriu Estadu 𝐄𝐱𝐩𝐞𝐝𝐢𝐭𝐨 𝐃𝐢𝐚𝐬 𝐗𝐢𝐦𝐞𝐧𝐞𝐬 iha okajiaun lori naran governu konstitusionál da-sia agradese ba governu Japaun tanba bele fo atensaun maka’as ba Timor Leste inklui mós RTTL, EP.
Nota entendimentu ne’ebé asina, tuir Sekretáriu Estadu, hatudu katak governu no povu Japaun nafatin fó atensaun ba iha povu Timor Leste, liuliu oinsá atu dezenvolve no promove liberdade espresaun no liberdade imprensa no liuliu bele haforsa kapasidade RTTL, EP nian.
Sekretáriu Estadu dehan, apoiu ne’e tulun tebes fó resposta ba espetativa públiku nian ba RTTL, EP ne’ebé durante ne’e atravesa situasaun durante tinan barak falta espasu no ekipamentu modernu sira.
“Ohin ita bele asiste serimónia ne’ebé importante i ba ha’u serimónia istóriku teb-tebes ba iha Timor Leste ein-jerál, espesiál ba RTTL, EP,” Sekretáriu Estadu subliña.
Iha oportunidade, Sekretáriu Estadu introduz programa governu da-sia nian ne’ebé fó mós atensaun boot tebes ba setór komunikasaun sosiál, liuliu ba RTTL, EP atu reforsa jestaun no moderniza ekipamentu sira no oinsá atensaun ba formasaun no kapasitasaun ba rekursu umanu iha RTTL.
Eis Prezidente RTTL ne’e mós rekoñese durante ne’e governu troka ba governu, nune’e mós konsellu administrasaun RTTL troka ba mai problema boot liu ne’ebé enfrenta maka espasu no ekipamentu, formasaun no kapasitasaun ba rekursu umanu.
Sekretáriu Estadu garante katak, durante nia mandatu sei fila RTTL, EP hanesan empreza estatal ne’ebé di’ak liu estasaun televisaun privadu sira seluk.
Entretantu kona-ba oferta husi Japaun, Sekretáriu Estadu husu atu hahú konstrusaun ne’ebé ho estudu viabilidade iha fatin atuál RTTL nian hodi nune’e labele iha problema natural sira durante obra ne’e hala’o no uza ba tempu ba naruk.
Sekretáriu Estadu mós kontinua husu funsionáriu hotu iha RTTL, EP atu servisu ho profesionál nafatin no hein katak bainhira edefísiu sentral iha ona i kompleta tan ho ekipamentu sufestikadu sira bele ajuda profesionaliza liu tan produtu hotu ne’ebé fó sai ba públiku.
“Bainhira buat hotu kompletu maibé ema servisu la ho profesionál no sentidu nasionalizmu maka sei la vale buat ida,” Sekretáriu Estadu subliña.
𝐌í𝐝𝐢𝐚 𝐒𝐄𝐊𝐨𝐦𝐒