Komunikadu Imprensa
Sorumutuk Konsellu Ministrus nian iha loron 8 fulan-novembru tinan 2023
Konsellu Ministrus hala’o sorumutuk iha Palásiu Governu, Dili, no hafoin halo análize ba konflitu sira foin daudaun ne’e iha parte balu territóriu nasionál nian, ne’ebé provoka husi elementu grupu rivál artes marsiais, no haree ba lakon vida ema nian no nesesidade hodi hatuur orden públika, deside, tuir lei ne’ebé vigora hela, hodi halo rekolla informasaun hotu ne’ebé nesesária, hamutuk ho entidade relevante sira hotu, ho objetivu atu foti desizaun iha tempu badak kona-ba medida sira ne’ebé sei adota/foti hodi hatuur filafali orden públika.
***
Ikusliu, Konsellu Ministrus delibera mós hodi fó toleránsia-de-pontu iha loron 13 fulan-novembru oinmai, ba funsionáriu, ajente no traballadór sira administrasaun direta Estadu nian, bele sentrál nune’e mós deskonsentradu, no organizmu sira administrasaun indireta, hodi fasilita partisipasaun populasaun nian iha votasaun daruak ba eleisaun Xefe Suku. REMATA
