Komisaun organizadóra loron nasionaís munisípiu Manufahi tera-feira (18/05) horsehik, realiza semináriu vertuál ho tema, hametin spíritu nasionalízmu no patritízmu hodi kontribui ba dezenvolvimewntu munisípiu Manufahi, hodi komemora loron restaurasaun independensia 20 de Maiu ba tinan 19 iha Manufahi.
Presidenti komisaun organizdóra Trinito Sarmento hateten, semináriu ne’ebé realiza iha salaun administrasaun munisípiu, ho modelu Vertuál ka meeting zoom oradór sira aprezenta sira nia matéria iha Dili ka fatin seluk, maibé partisipante sira bele akompaña direita iha fatin semináriu no bele mós akompaña liu husi sira nia telemóvel.
Iha semináriu ne’e komisaun konvida oradór na’in 2, padre Martinho Gusmão aprezenta matéria ho tópiku sidadania liga ho fiar kristaun nian, no oradór segundu presidenti komité 25 Dr.Costánsio Pinto ho tópiku memóriza istória luta libertasaun independénsia hodi konkritíza libertasaun povo.
Presidenti komisaun ne’e informa, tuir programa semináriu ne’e konvida oradór sira mai direita iha Manufahi hato’o sira nia aprezentasaun ba partisipante sira maibé relasiona ho pandémia covid-19, entau komisaun deside realiza semináriu ho métudu vertuál.
Fatin hanesan administradór munisípiu Manufahi Arantes Isaac Sarmento, aprésia ho semináriu vertuál ne’ebé realiza husi komisaun seksaun akadémiku no konsellu joventude Munisípiu Manufahi, partíla istória luta libertasaun nian ba estudante hanesan jerasaun foun, nune’e bele hametin ispíritu patriotízmu no nasionalízmu ba jerasaun foun sira hodi kontribui ba dezenvolvimentu munisípiu nian.
Nune’e mós estudante Afdiana Beatris Yusma Dias, sente urgullu tuir semináriu vertuál ida ne’e tanba bele hatene kona ba istória luta libertasaun nian, maske tinan ida ne’e komemorasaun 20 de Maiu la realiza.
Entretantu semináriu ne’e hala’o tarde, tanba problema liña internet relasiona ho udan, maibé semináriu vertuál ne’e konsege realiza to’o remata.(esm).
