Manufahi RKM News======Administradór munisípiu Manufahi kuarta-feira (26/05) ne’e, aprezenta defikuldade la iha makina teste swab no la iha orsamentu ba ekipa task-force munisípiu, ba Visé ministru Administrasaun Estatal (MAE).
Administradór Arantes Isaac Sarmento, hanesan presidenti komisaun task-force covid-19 munisípiu MAnufahi, aprezenta kestaun ne’e ba visé ministru MAE iha sorumutu ho autóridade no lideransa komunitária sira iha salaun administrasaun munisípiu Manufahi hateten, munisípiu Manufahi la iha fasilidade ka laboratóriu teste swab, inklui orsamentu ba ekipa téknika task-force defikulta tebes hodi kombate transmisaun lokál covid-19, ne’ebé fó risku ba sidadaun sira nia vida iha munisípiu Manufahi.
Presidenti komisaun Task-force Manufahi ne’e rekomenda ba visé ministru MAE, atu resolve situasaun ne’e hodi mellora di’ak liu tan servisu komisaun nian iha munisípiu ne’e.
Arantes relata, durante ne’e komisaun rejista sidadaun ka estudante sira ne’ebé halo viajém tama-sai iha munisípiu Manufahi iha postu entrada sira ho total sidadaun na’in 13.021, kompostu Tama mai iha Manufahi sidadaun hamutuk na’in 6.395, no sidadaun ne’ebé sai husi Manufahi ba munisípiu seluk hamutuk ema na’in 6.625.
Komisaun mós prepara fatin no halo jestaun hodi halo kuarentena ba Sidadaun hamutuk ema na’in 579 reintregra ba familia hamutuk ema na’in 577, sidadaun ne’ebé pozitívu iha fatin izólamentu ho total ema na’in 54 no rekopera hotu, hodi reintregra ona ba familia.
Komisaun task-force mós instala ona fasilidade fasé liman iha fatin públiku sira hamutuk 47,tanki boot iha 26 no taki ki’ik 21, no komisaun mós dadaun ne’e kontínua halo sosializasaun ba prevensaun covid-19 inklui vasínasaun astrazeneka ba komunidade sira iha suku no aldeias iha munisípiu Manufahi.
Hatán ba prekupasaun administradór munisípiu nian, visé ministru MAE Lino de Jesus Torezão hateten sei aprezenta preukupasaun ne’e ba ministériu saúde hodi buka soluasaun.
Visé ministru MAE hateten objetivu ninia vizita traballu durante loron 2 iha munisípiu Manufahi, atu haklaken informasaun kona ba polítika governu nian hodi responde ba kalamidade ne’ebé mosu iha Dili no munisípiu seluk, nune’e mós atu haklaken informasaun kona ba polítika governu nian ba prevensaun covid-19 iha Timor leste.
Entretantu visé ministru MAE hala’o ninia vizita iha postu administrativu Alas no Fatuberliu, halo diálogu ho autoridade no lideransa komunitária sira, rona mós defikuldade komunidade nian, ne’ebé aprezentasaun husi lideransa komunitária sira.(ek).
