Manufahi RKM News Estrutura KONSANTIL Munisípiu Manufahi kuarta-feira (12/10) ohin, realiza sorumutu hodi halo preparasaun ba atividade feira ba prodútu lokal, iha merkadu antígu Same, hodi komemora loron ai-haan mundiál iha Munisípiu Manufahi.
Presidenti KONSANTIL Munisípiu Manufahi Arantes Isaac Sarmento, atuál Administardór Munisípiu hateten, inkóntru ne’e ho objetívu atu avalia progrésu programa KONSANTIL nian ne’ebé implementa iha suku Fahinehan postu administrativu Fatuberliu, nune’e mós forma komisaun organizadóra atu organiza no halo preparasaun ba atividade feira ne’ebé sei realiza iha merkadu antígu Same, tuir data tentatíva sei realiza iha fin semana fulan ida ne’e.
Presidenti KONSANTIL Munisípiu Manufahi ne’e, apéla ba membru strútura KONSANTIL ne’ebé kompostu husi liña sektorais sira iha Munisípiu Manufahi, tenki sériu no iha kometmentu hodi implementa programa KONSANTIL ne’ebé planeadu ona iha suku Fahinehan postu administrativu Fatuberliu, hanesan suku pilotu ba implemensaun programa redusaun mál-nutrisaun,saúde siguransa ai-haan no seluk seluk tan, maibé realidade programa ne’ebé planeadu la atinji tuir metas.
Tuir Arantes, programa ne’ebé ita planu maibé la konsege realiza ne’e hatudu katak ita ba bosok hela povu, tanba ne’e apéla ba Membru KONSANTIL sira, tenki iha kometmentu no seriadade hodi hala’o programa KONSANTIL nian, tuir planu ne’ebé planeia ona, nune’e bele benefisia ba povu iha area remotas.
Autóridade másimu Munisipiu Manufahi ne’e reálsa, inkóntru avaliasaun tuir mai maibé membru strútura KONSANTIL nian ne’ebé kompostu husi servisu liña sektorais sira tenki aprezenta sira nia programa ne’ebé implementa iha suku pilotu.
” liliu diretúr óbras públika, Saúde, agríkultura, diretúr komérsiu industria, no diretúr liña sektorais sira seluk tenki aprezenta ninia progrésu ne’ebé implementa iha suku pilotu, nune’e ita bele hatene ona progrésu iha implementa programa KONSANTIL iha suku pilotu, selae hanesan dadaun agora ne’e, mai inkontru la iha Rezúltadu, haan tiha meudia fila la iha Rezúltadu, ita mai ne’e atu deskuti kona ba problema povu nian, ita mai atu ko’alia ona programa KONSANTIL nian ne’ebé ita implementa ba povu, ko’alia ba bee moos, saúde, agríkultura,edukasaun no seluk seluk tan”
Entretantu partisípa iha sorumutu ne’e strútura KONSANTIL ne’ebé kompostu husi diretúr servisu munisípais inklui parseiru dezenvolmentu sira.
