Manufahi rkm news – Tersa feira (28/02) ne’e Minístru Petróliu no minarais (MPM), Víse Minístru justisa (MJ), Sekretáriu estadu Terras prioridade, víse presidenti Timor Gab, hamutuk ho autóridade Munisípiu Manufahi, realiza díalogu ho komunidade Afetadu uma ka’in 27 ba projétu refinaria Betano, ne’ebé seidauk hetan indemenizasaun husi estadu.
Tuir minístru Petróliu no minarais, Victor da Conceição Soares hateten kestaun ida ne’e kleur ona komesa iha tinan 2020 hala’o díalogu komunidade Afetadu uma ka’in 27 ne’ebé desputa ladauk rezolve tanba susar atu lori ekipa tékniku no Ministru sira atu solusiona kestaun ne’e, maibé ohin ha’u mai ho Ministru justisa hamutuk ekipa teknika sira, Administardór Munisípiu, komandante polísia, halo díalogu ho komunidade Afetadu, hodi solusiona parsela 27 ne’ebé sei iha disputa.
Agradese tanba ohin konsege rezolve ona parsela 13 no sei hela parsela 14 sei iha kompleksidade oituan, entau ami tenki lori fila ba nasionál involve tékniku sira, asesór juridiku sira, Ministériu agríkultura, Sekretária estadu arte no kultura, minísteriu adminístrasaun Estatal no sira seluk tan, halo kordenasaun oinsá bele buka desizaun ida ba ita nia komunidade afetadu 14 ne’ebé ohin seidauk rezolve
Minístru Victor subliña, parsela 27 ne’e komplikadu oituan tanba, parsela 13 ne’ebé hetan solusaun ona sira iha duni póse okupasaun rai, iha duni faktu ai-horis, liman fatin, maibé ba parsela 14 ne’ebé ladauk iha solusaun ne’e komplikadu tanba, liman fatin la iha, rai tradisaun ne’ebé avo sira husik hela, maibé lei ezizi tenki iha faktus ruma, maibé ida ne’e la iha .
Fatin hanesan Víse minístru justisa José Edmundo Caitano (Sala Timor) hateten, ha’u aprésia ho vontade komunidade afetadu ba projetu refinaria ne’ebé sei implenta iha Betano, komunidade kolabora di’ak ho estadu hodi solusiona problema ne’ebé iha, ekipa tékniku aprezenta kona ba rai ne’ebé okupante 27 nian balun iha póse, rai eransa, no sira seluk hamutuk 27 no ita konsege resolve ona komunidade afetadu 13, no komunidade 14 seidauk konsege resolve, tanba ne’e iha semana oin teknika sira sei tuir hamutuk fo hanoin, fo parsere legál, polítika sosio-ekonomia ba intidade no Ministériu justisa no minístru Petróliu no minarais hodi buka solusaun.
Komunidade afetadu Mário Sexas Tilman hateten, ha’u ko’alia ba hau nia inan nia rain, ne’ebé tama mós iha projétu refinaria nian, ami nia rai konsidera rai eransa husi ami nia avo sira hamutuk ho katuas lisan na’in sira maka fahe ba ami, ne’ebé ami nia rai ho parsela 211 iha parte oin, komunidade balun nia rain iha sor-sorin hetan indeminizasaun husi estadu, maibé ami nia iha oin la hetan fali, estadu konsidera rai sira seluk, tanba sá ami komunidade afetadu 27 estadu la konsidera.
Nune’e mós komunidade afetadu Recardo Tilman, ha’u aprésia ho inisiativa oitávu governu konstitusionál, tanba komesa tinan 2016 governu anterior halo identifikasaun ba rai, ami mós konsidera afetadu tanba ami nia rain mós tama iha projétu refinaria, ita hare tuir lei estadu konsidera hanesan rai abandona tanba ne’e mosu desputa ha’u ho estadu, maibé kuandu mosu desputa ha’u mós halo deklarasaun lubuk ida hodi hato’o ha’u lamentasaun, tanba konsidera rai ne’e rai eransa, maibé ha’u urgullu liuhosi díalogu ne’e bele hetan solusaun ruma, hanesan Manufahi oan prontu kopera ho estadu tanba Betano sei sai hanesan kurasaun dezenvolmentu ba estadu Timor leste.
Nune’e mós Administardór Munisípiu Manufahi Arantes Isaac Sarmento agradese ba víse Minístru justisa, minístru Petróliu no minarais, Sekretária estadu Terras prioridade, ekipa tékniku sira mai halo díalogu ho komunidade Afetadu 27, hodi buka solusaun ba problema desputa rai entre komunidade afetadu ho estadu.
“Hanesan Servidór povu iha Manufahi, agradese ba povu Betano, tanba sira mós kontribui ona ba libertasaun pátria, nomós kontribui ba libertasaun povu, tanba povu Betano oferese ona rai lubuk ida ba dezenvolvimentu séntru eletriku Betano, iskola institútu politékniku Betano, nomós projétu refinaria, tanba ne’e nu’udar servidór povu iha Manufahi rekomenda ba Minístru Petróliu no minarais, minístru Justisa, no Sekretáriu estádu Terras prioridade, atu konsidera preukupasaun komunidade afetadu sira, tanba baseia ba lei kona ba rai, preukupasaun komunidade nian “LEI” la konsidera, maibé ko’alia ho “FUAN” bele fo mós konsiderasaun ba komunidade afetadu sira nia preukupasaun, komunidade afetadu 13 iha ona solusaun, maibé ba komunidade afetadu 14 sai preukupasaun ida ba Na’i Minístru sira, presisa haree hodi konsidera mós komunidade afetadu 14 ne’e, hanesan mós komunidade afetadu 13 ne’ebé iha ona solusaun, tanba komunidade afetadu 14 hanesan povu Manufahi no povu Timor oan, Arantes akrésenta”.
Administradór Arantes husu mós ba ekipa teknika sira, presisa haree didiak ba preukupasaun komunidade afetadu sira, ita labele husik ita nia komunidade afetadu sira, balun kontenti no balun triste ba projétu refinaria iha Betano, no mós labele husik povu Betano sai fali bainaka ba dezenvolvimentu iha rai Manufahi.
Entertantu durante díalogu ne’e, komunidade afetadu sira kopera di’ak, hodi solusiona problema desputa rai ba projétu refinaria Betano, komunidade afetadu 13 hetan ona solusaun no sira prontu simu indemenizasaun hodi oferese rai ba estadu, no komunidade afetadu 14 maka ladauk hetan solusaun.
Jornalista : Senya/vas
