Manufahi RKM News—Ekipa fútebal Fórsa Falintil Defésa Timor-Leste (F-FDTL) Navál postu Betano, sai vensedór iha kompetisaun fútebal tása Administradór Munisípiu, hodi komemora loron restaurasaun independénsia tinan ne’e iha Munisípiu Manufahi.
Presidenti komisaun organizadora loron Nasionál Munisípiu Manufahi, Arantes Isaac Sarmento atuál Administradór Munisípiu hateten, kompetisaun fútebal entre instituisaun estadu no organizasaun sosiedade sivil, tama ba final entre ekipa F-FDTL hasoru ekipa konjunta PNTL no autoridade protesaun sivil (APC) iha kinta-feira (18/05) horsehik, rezultadu ekipa Ekipa F-FDTL manan 1:0 husi rezultadu ne’e ekipa F-FDTL sai primeiru lugar,PNTL-APC segundu lugar no ekipa konjunta BNCTL-F-LBF terseiru lugar.
Sefi seksaun disportu Pio Fernandes relata, premiu ba manan na’in sira, primeiru lugar hetan tása rotatíva Administradór CUP ho osan dólar $55.00, segundu lugar hetan osan $50.00 no terseiru lugar hetan osan $40.00.
Kaptaun ekipa F-FDTL Diégo Grigório Soares sente kontenti bele lori ekipa F-FDTL sai manan na’in iha kompetisaun ne’e, no agradese ba administrasaun Munisípiu bele invólve ekipa F-FDTL hodi partisipa iha kompetisaun tása Administradór hodi anima komemorasaun loron restaurasaun independénsia tinan ne’e iha Munisípiu Manufahi.
Entertantu premiu ba kompetisaun ne’e sei intréga ba manan na’in sira hafoin remata serimónia isár Bandeira loron restaurasaun independénsia iha Luak sábadu fun semana aban.
Reportájem ekipa RKM
