Sorumutuk Konsellu Ministrus nian iha loron 2 fulan-outubru tinan 2023
Konsellu Ministrus hala’o sorumutuk iha Palásiu Governu, Dili, no delibera ona hodi aprova montante totál despeza nian ne’ebé relasiona ho títulu orsamentál ida-idak kona-ba Orsamentu Jerál Estadu ba tinan 2024 (OJE 2024), ho valór globál ne’ebé prevee ona hamutuk dolar amerikanu billaun 1,6.
Montante ida-ne’e reflete redusaun 18%, ekivale ba dolar amerikanu hamutuk millaun 360, kompara ho OJE tinan 2023.
Tetu agregadu dolar amerikanu hamutuk biliaun 1,6 inklui dotasaun ida husi dolar amerikanu hamutuk 1.458.292.345 ba administrasaun sentrál, dolar amerikanu hamutuk 81.707.655 ba seguransa sosiál no dolar amerikanu hamutuk 60.000.000 destina ba Rejiaun Administrativa Espesiál Oekusi Ambenu. Valór ida-ne’e la inklui Fundu Rezerva Seguransa Sosiál nian, ho montante hamutuk dolar amerikanu 162.007.651.
Ho valór totál OJE tinan 2024, parsela husi 400.276.781 sei aloka ba saláriu no vensimentu, hodi reprezenta ba redusaun husi pursentu 14% iha relasaun ho tinan 2023. Ho valór 254.767.075 ba beins no servisus, hodi reflete diminuisaun husi 36% kompara ho OJE tinan 2023. Ba despeza kapitál menór, prevee ho montante dolar amerikanu 247.320, enkuantu ba kapitál dezenvolvimentu dolar amerikanu milloins 177.606.384, ne’ebé koresponde ba redusaun husi pursentu 14% no 23%, ida-idak. Ikusliu, prevee dotasaun ida 767.102.440 ba transferénsias públikas, ne’ebé maka reprezenta redusaun ida husi 13% kompara ho OJE tinan 2023.
Entidades públikas sei finaliza sira-nia proposta orsamentu, hodi bele analiza husi Komité Revizaun Orsamentál loron 23 ouubru to’o loron 9 fulan-novembru. Prevee katak projetu Proposta Lei OJE tinan 2024 bele aprova husi Konsellu Ministrus to’o Loron 14 fulan-novembru tinan 2023 no sei entrega ba Parlamentu Nasional to’o loron 24 fulan-novembru.
Ikusliu, Konsellu Ministrus delibera ona hodi autoriza asinatura Akordu Administrativu ba aplikasaun Konvensaun entre Timor-Leste no Portugál kona-ba seguransa Sosiál no Memorandu Entendimentu entre Ministériu Traballu, Solidariedade Sosiál no Inkluzaun Portugál no Sekretaria Estadu Formasaun Profisionál no Empregu Timor-Leste kona-ba Mobilidade Traballadór Timoroan nian. Akordu sira-ne’e sei asina husi Ministra Solidariedade Sosiál no Inkluzaun, Verónica das Dores no Sekretáriu Estadu Formasaun Profisionál no Empregu, Rogério Araújo Mendonça, respetivamente, durante vizita ofisiál ba Portugál.
Akordu dahuluk ne’e ho objetivu atu permite artikula no koloka iha vigór Konvensaun Seguransa Sosiál, ne’ebé permite katak sidadaun timoroan no portugés sira bele hetan benefísiu iha país rua ne‘e, no ho benefísius Seguransa Sosiál ne’ebé hanesan husi nasaun rua ne’e ida. Nune’e, iha futuru timoroan sira bainhira sira husu reforma, hodi sura, sira bele halo kálkulu pensaun nian kona-ba deskontus ne’ebé sira halo ona durante serbisu iha Portugál.
Akordu daruak ho objetivu atu fasilita no organiza ho forma institusionál entrada timoroan sira ba Portugál hodi buka servisu. Ho akordu ida-ne’e, migrasaun timoroan sira ba Portugál bele trata ona ho dalan ofisiál no sei fasilita prosedimentu sira ne’ebé presiza hodi hetan vistus servisu. Remata
