Eleisaun Xefe Suku ne’e sei hala’o iha loron 27 fulan-abríl no apuramentu ba rezultadu tenke termina iha loron 28 fulan-abríl tinan 2024. Uainhira laiha kandidatu xefe suku ne’ebé maka hetan votu válidu liu metade ne’ebé fó-sai, sei realiza filafali votasaun daruak entre kandidatu rua ne’ebé hetan votu maioria iha loron 13 fulan-maiu tinan 2024.
Votasaun ba eleisaun Lia na’in no Reprezentantes Juventude ba Konsellu Suku sei hala’o to’o loron 8 fulan-maiu ka to’o loron 24 fulan-maiu tinan 2024.
***
Rezolusaun Governu kona-ba apoiu hodi rekolla lixu iha Dili, ne’ebé aprezenta husi Ministru Planeamentu no Investimentu Estratéjiku, Gastão Francisco de Sousa, mós hetan aprovasaun.
Governu rekoñese nesesidade urjente atu kombate lixu, inklui lixu tasi, liuhusi asaun oioin hanesan sensibilizasaun, limpeza iha tasi no tasi ninin, no inisiativa seluk hodi halo monitorizasaun, kontrolu, redusaun no mitigasaun lixu.
Objetivu husi projetu Rezolusaun Governu ida-ne’e maka atu promove koordenasaun entre ministériu oioin no entidade públika sira hodi alkansa objetivu ba Rezolusaun ida-ne’e, liuliu ba sira ne’ebé responsavel ba meiu ambiente no administrasaun estatál, nune’e mós determina hodi halo prosedimentu nesesáriu ba aprovasaun no finansiamentu operasaun sira ne’e, to’o montante másimu dolar amerikanu millaun 1,88.
