Manufahi RKM News—Tersa Loron (18-07),BTL’EP nasionál distribui material ba manutensaun fasilidade bee-moos ne’ebé hetan estrágu iha sidade kapitál Munisípiu Manufahi ohin loro-kraik, to’o ona iha edifisiu BTL,EP Munisípiu Manufahi.
Ofisiál BTL’EP Nasional Joaquim Lopes relata katak, Matérial ne’ebé ohin ami lori mai, kanu inz 6 hamutuk lolon 22, inz 2 lolon 12, inz 3 tuir pedidu husu loloon 23 maibé ami lori uluk lolon 8 tanba iha Dili la iha, polypipe inz 3 lolon 12, Polypipe inz 4 lolon 20, inklui asesoris sira seluk.
Material hirak ne’e to’o, iha edifisiu BTL EP Munisípiu Manufahi, simu direitamente husi kordenador BTL’EP Munisípiu Manufahi ho funsionáriu BTL EP Munisípiu, hodi halo manutensaun ba fasilidade bee-moos ne’ebé hetan estrágu totál kauza husu udan bo’ot lalais, nune’e bele troka no halo manutensaun ba kanu 40 resin ne’ebé hetan estrágu, hodi Normaliza hikas fali bee-moos ba komunidade sira.
Iha parte seluk, Administrasaun Finansa BTL’EP Munisípiu Manufahi Daniel Thomas, lamentadu tebes ho krítika husi autóridade balun hateten katak, BTL’EP Munisípiu lentu liu resolve no normaliza problema bee-moos ba komunidade sira, tuir loloos autóridade sira tún direitamente hodi haree realidade ne’ebé akontese, maka bele halo kritika hasoru servísu ekipa BTL’EP.
Danile Thomas hateten, Ami BTL’EP la’ós la halo servísu, ami esforsu maske udan, fasilidade no ekipa tekniku limitadu maibé ami konsege halo servisu, tanba kanu 40 resin ne’ebé hetan estrágu husi korenti mota, rai halai, estrada kotu, no ponte monu halo estrágu mós ba kanu distribuisaun hamutuk kanu 8 maka aat total, kompostu iha suku Letefoho kanu distribuisaun 5 no suku Holarua kanu distribuisaun 3.
Kanu distribuisaun 8 ne’ebé hetan estrágu, kompostu husi parte suku Letefoho postu Same kanu distribuisaun 5 maka aat, ami konsege rezolve ona 4 falta kanu distribuisaun 1 maka seidauk hadia tanba fasilidade la iha, maibé husi kanu distribuisaun 4 ne’ebé konsege hadia ona, fasilita ona bee-moos ba komunidade sira iha Aidahaleu parte sorin, uma-forma, ospital maske bee maka ki’ik, postu antigu, nularan, parte Igreiza no fatin seluk tan hetan ona bee-moos.
iha parte suku Holarua kanu distribuisaun 3 ne’ebé hetan estrágu, ami esforsu hadia ona kanu distribuisaun 1 agora bee la’o hela hodi fasilita bee-moos ba komunidade sira, no ami kontinua esforsu hadia tan kanu distribuisaun 2 seluk, maibé ami sei aprosima ho planu óbras publika nian, kona ba rehabilitasaun estrada, nune’e la prejudika fali kanu distribuisaun nian.
Daniel akresénta, Ami la’os la halo servisu hanesan autóridade balun kritika, maibé ami hala’o duni ami nia servisu maske udan, fasilidade no ekipa tekniku limitadu, maibé ami kontinua esforsu konsege hadia kanu distribuisaun sira ne’ebé hetan estrágu total, hodi fasilita bee ba komunidade sira, maske ladauk másimu, tanba akontese udan estrágu fasilidade la’os buat kaman, kanu inz 6 ne’ebé hetan estrágu presisa ema barak maka foti tanba todan, tanba ne’e la fasil atu resolve, hanesan ema balun krítika.
Daniel Thomas subliña, Matérial ne’ebé distribui ona husi BTL’EP Nasional, ami sei halo karta ba autóridade sira, husu apoiu funsionáriu, polísia, komunidade inklui transporte, atu ho voluntáriu apoiu Ekipa BTL’EP, hodi halo manutensaun no troka kanu sira ne’ebé hetan estrágu totál, nune’e bele normaliza bee-moos ba komunidade sira ne’e, tanba Ekipa tekniku BTL, EP limitadu.
